Unha fiestra aberta.

​

Como cada ano, dende hai seis, o clasclás abre a porta ás moitas e variadas actividades estivais que acolle e ofrece Vilagarcía.

 

Aínda que centrado principalmente na música de cámara, o clasclás, un festival sen ataduras nin prexuízos e cada vez máis esixente, tamén nos permitirá nesta edición gozar dun recital de piano, un concerto de música antiga e un concerto de clausura de corte máis moderno. Todo iso na procura de experiencias enriquecedoras e diferentes, tanto para os profesionais e amantes da música clásica que acoden a un festival para escoitar a intérpretes e obras de elevado nivel artístico, como para calquera persoa que aínda non descubriu toda a beleza e sensibilidade que hai nunha obra musical.

 

O clasclás representa fielmente a idea da democratización do acceso á cultura e á educación en xeral que defende e sostén o concello de Vilagarcía. Tanto no que refire á música clásica como a calquera outra representación musical. En tanto que entendemos que a difusión da música, das artes e da cultura en xeral pode chegar a ser moi inspirador e enriquecedor para o público.

 

O clasclás abre a porta ao verán en Vilagarcía, pero é unha fiestra aberta a moitas cousas máis: abre os oídos de moitas persoas que se achegan por primeira vez a estas músicas, abre as nosas mentes, abre novas perspectivas e abre os nosos corazóns. Celebrémolo.

 

Alberto Varela García

Alcalde de Vilagarcía de Arousa